SA JAGTER/HUNTER | Januarie-Februarie 2023 | Deur KARLA JANSE VAN VUUREN | Foto’s: GERRIE JANSE VAN VUUREN

(genoeg vir 4-6 mense)

 

JY BENODIG:

 

VIR DIE BLAARKORSDEEG:

• 400 g koekmeel

• 2,5 ml sout

• 300 g yskoue botter

• sowat 250 ml yswater

 

VIR DIE WELLINGTON:

• 500 g sampioene, skoongemaak en in skyfies gesny

• 90 ml olyfolie

• 200 g baba-spinasie

• 1 stuk wildebeesrugfilet (sowat 25 cm lank)

• sout en peper na smaak

• 25 ml Dijon-mosterd

 

VIR DIE SOUS:

• 1 rooi ui, fyngekap

• 1 klein knoffelhuisie, fyngekap

• 250 g gemengde sampioene, skoongevee en fyngekap

• 25 ml olyfolie

• ’n skeut brandewyn (na smaak)

• 250 ml hoender- of beesvleisaftreksel

• 125 ml room

• 50 ml vars pietersielie, fyngekap

• sout en varsgemaalde swartpeper na smaak

​

SO MAAK ’N MENS:

1. Maak eerste die blaardeeg: Meng die meel en sout saam in ’n groot mengbak. Rasper die botter in die meelmengsel in. Gebruik jou vingerpunte om dit deur die meel te roer. Voeg yswater by en maak dit aan tot ’n deeg. Draai dit in kleefplastiek toe en plaas oornag in die yskas.

2. Vir die vulsel: Braai die sampioene in 40 ml olie tot gaar. Skep dit uit die pan en laat dit afkoel. Plaas dit dan in ’n voedselverwerker en verwerk tot ’n pasta.

3. Gooi nog ’n bietjie olie in die pan en plaas die baba-spinasie daarin. Sit die deksel op en los dit vir ’n rukkie tot dit begin verwelk. Roerbraai dan die spinasie tot dit net-net verwelk is. Skep uit en hou eenkant.

4. Geur die vleis met sout en peper. Smeer die vleis reg rondom met die mosterd. Plaas in ’n vlak pan en braai in 50 ml olie tot verseël aan alle kante. Skep die vleis uit die pan. Draai dit styf toe in kleefplastiek en plaas in die yskas om heeltemal af te koel.

5. Voorverhit die oond tot 200 °C. Smeer of bespuit ’n bakplaat en voer dit ook met kleefwerende bakpapier uit.

6. Rol die deeg uit in ’n vierkant van 30 cm groot en 5 mm dik op ’n meelbestrooide oppervlak. Afhangende van hoe groot jou vleis is, gaan jy dalk net helfte van die hoeveelheid deeg benodig. Die res kan maklik gevries word vir latere gebruik.

7. Smeer die sampioenpasta in die middel van die deegvierkant, so breed soos die vleisrol is.

8. Versprei die spinasie eweredig oor die sampioenlaag.

9. Haal die vleisrol uit die yskas en verwyder die kleefplastiek. Plaas die vleis bo-op die spinasielaag. Rol die deeg styf op, soos vir ’n rolkoek. Plaas die deegrol op die bakplaat met die naat na onder.

10. Rol die orige deeg uit en sny blaartjies of versierings uit en plaas op die deegrol. Bestryk die deeg met ’n geklitste eiergeel.

11. Bak die Wellington vir 30-40 minute of tot goudbruin.

12. Vir die sous: Braai die uie en knoffel tot sag, maar nie verbruin nie. Voeg die sampioene by en braai tot goudbruin. Voeg die skeut brandewyn by en kook vir twee minute tot die alkohol weggekook het. Roer die aftreksel en room by en kook tot die sous begin verdik. Roer die pietersielie by, proe en geur na smaak met sout en swartpeper.

13. Haal die Wellington uit die oond en sny in porsies. Sit warm voor met ’n lekker skeppie van die sous. Bykosse wat heerlik hierby sal werk, is sagtestingel-broccoli wat liggies gerooster is, besprinkel met geroosterde amandelvlokkies en gekrummelde feta. Probeer ook oondgebakte babawortels wat met ’n bietjie heuning afgerond is. 

 

BLAARDEEGWENKE 

Theresa de Vries gee die volgende wenke in Deeg vir wanneer jy blaardeeg maak:

• Die botter moet koud genoeg wees om dit lossies in die meelmengsel te rasper. Doop die botter gereeld in die meel terwyl jy dit rasper, dan kom dit makliker los van die rasper.

• Maak seker jou oond is behoorlik warm voordat jy die Wellington insit, anders kan die botter uitbak.

• Moenie die deeg te veel hanteer nie. Moet ook nie die botter invryf nie – gebruik net jou vingerpunte om dit deur die meel te roer, anders kan jou deeg te min poflagies vorm.

• Maak seker jou deeg rus lank genoeg nadat jy dit aangemaak het, anders kan dit dalk van die vleis wegkrimp.

• Bak die Wellington lank genoeg sodat die onderkant van die deeg nie nat of pap is nie, maar wees ook versigtig om dit nie oorgaar te maak nie. Die bakproses verg beslis ’n fyn oog, maar die eindproduk is absoluut die moeite werd.